Бээтинсэҕэ от ыйын 31 күнүгэр Айсен Николаев бырабыыталыстыба саҥа бэрэссэдээтэлин э.т. Андрей Тарасенконы кытары билиһиннэрдэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.


«Андрей Владимирович Тарасенко Владивостоктан төрүттээх Уһук Илин төрүт олохтооҕо, онон кини эрэгийиэҥҥэ саҥа киһи буолбатах. Улахан судаарыстыбаннай корпорацияларга, федеральнай уонна региональнай былаас уорганнарыгар үлэлээбит уопуттаах», — диэтэ Ил Дархан.    

«Арктиканы, суол инфраструктуратын сайыннарыы, федеральнай бырабыыталыстыбаны, госкорпорациялары кытары алтыһыы бырабыыталыстыба сүрүн соруктарынан буолаллар. Андрей Владимирович маныаха сөптөөх билиилээх. Биһиэхэ ыйыллыбыт боппуруостары үрдүк таһымҥа быһаарсар киһи наада», — диэтэ Айсен Николаев.

Андрей Тарасенко миниистирдэргэ туһаайан этиитигэр итэҕэллэрин иһин махтанна. «Бүгүн Саха сирэ дойдуга элбэҕи биэрэр. Ол иһин бу сиргэ олорор киһи олох бары уйгутунан туһанан, дьоллоохтук олорорун ситиһиэхтээхпит. Ил Дархан туруорбут соруктарыгар киһи инники күөҥҥэ сылдьар», — диэтэ кини.

Санатабыт, 2018 сыл бэс ыйыттан бу сыл муус устарыгар диэри Саха сирин бырабыыталыстыбатын Владимир Солодов салайан кэлбитэ. Муус устар 3 күнүгэр кинини Камчатка кыраайын күбүрүнээтэрин э.т.анаабыттара. Андрей Тарасенконы өрөспүүбүлүкэ премьерын э.т. аныыр туһунан ыйааҕы Айсен Николаев бүгүн, от ыйын 31 күнүгэр баттаата.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.