Ил Дархан Айсен Николаев Амма улууһугар бурдук ыһыытынан дьарыктанар Амма АУо үлэтин билистэ. Айсен Сергеевич Покровка нэһилиэгэр Аллаах учаастагар хомуур үлэтин көрдө, бурдугу мэлийэр сиргэ сырытта. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Тэрилтэ дириэктэрэ Роман Спасьев туорахтаах култуура үүннэриитин улаатыннаран, өрөспүүбүлүкэ хаһаайыстыбаларын сиэмэнэн хааччыйарга үлэлэһэр былааннаҕын эттэ.
«Айсен Николаев биһиэхэ 2018 сыллаахха сылдьыбыттаах. Онно кэккэ дьаһаллар ылыллыбыттара. Бурдугу хомуйар комбайннары, анал тиэхиньикэни тыа хаһаайыстыбатын министиэристибэтин нөҥүө судаарыстыбаннай бырагыраама суотугар ылбыппыт. Инникитин туорахтаах култуура баалабай хомуурун 1600-тэн 3500 гектарга тиийэ улаатыннарар сорук турар», — диир дириэктэр.
«Амма» АУо билигин 4,5 тыһ. гектар туорахтаах бурдугу ыһар бааһыналаах, 530 гектар ходуһалаах, икки бурдугу мэлийэр сирдээх, 16 тыраахтырдаах, аҕыс бурдук хомуйар комбайннаах, сэттэ таһаҕас тиэйэр массыыналаах.
2019 сылга 1716 туонна былаантан бурдук баалабай хомуура 2793 туоннаҕа тэҥнэспит. Биир гектар сиртэн 14,9 центнер үүнүүнү ылтар. Бу 2007 сылтан бастыҥ көрдөрүү.
Быйыл хаһаайыстыба 1500 гектарга туорахтаах култуураны, ол иһигэр 406 гааҕа нэчимиэни, 758 гааҕа эбиэһи, 336 гааҕа сэлиэһинэйи. 1800 туонна хомуллара былааннанар. Онтон 800 туонната комбикорм оҥоһуутугар барыа.
«Сиэмэ үүннэриитигэр билиҥҥитэ бары усулуобуйа барыта баар: Ааллаах уонна Покровка нэһилиэгэр ыраастыыр комплекстар, үс тыһ.туоннаҕа тиийэ бурдугу харайар ыскылааттар, сиэмэлэри ыстарар дьааттар, онтон да атын араас оҥорон таһаарыыга наадалаах тэриллэр. Инникитин сири оҥоруу үлэтин итиэннэ өрөспүүбүлүкэҕэ, оройуоннарынан бурдук үүннэриитин сүрүн сорук быһыытынан туруорабыт«, — диир Роман Спасьев.
Айсен Николаев тэрилтэ үлэтин биһирээтэ, былаан быһыытынан үлэтин тутуһан үлэлээтэҕинэ туруоруммут сыалларын ситиэ диэн эрэлин биллэрдэ.
