«Агростартап» куонкуруһу СӨ тыа хаһаайыстыбатын министиэристибэтэ тэрийэн ыытар. «Кыра уонна дьоҕус урбаан уонна биирдиилээн урбаанньыттар бачыымнарын өйөөһүн» национальнай бырайыак уонна “Федерация ситимин өйөөһүн” региональнай бырайыак чэрчилэринэн ыытылларын туһунан СИА иһитиннэрэр.
Чурапчы улууһуттан куонкуруска Килэҥки нэһилиэгиттэн Василий Потапов, Владимир Боякинов, Руслан Алексеев (Төлөй-Дириҥ), Михаил Попов (Харбала-1), Сергей Крылов (Харбала-2), Ким Тимофеев, Михаил Попов, Александр Попов (Чыаппара) кыттыахтара.
Хамыыһыйа мунньаҕа видеоконференц-сибээһинэн от ыйын 6-8 күннэригэр барыаҕа. Тэрээһиҥҥэ быйыл тэриллибит бааһынай хаһаайыстыбалар (КФХ) эбэтэр грант ылар түгэннэригэр хаһаайыстыба тэриниэн баҕалаах биирдиилээн дьон кыттар бырааптаахтар.
Грант үбүн сүөһү атыылаһыытыгар, тыа хаһаайыстыбатыгар наадалаах техниканы, сири ылыыга, производственнай эбийиэктэргэ уот-күөс киллэриитигэр туттуохха сөп.
Куонкуруска барыта 157 сайаапка киирбитэ, мантан 22 улуустан 94 кыттааччы холонон көрүө.
