Айсен Николаев бүгүн учууталлар атырдьах ыйынааҕы мунньахтарыгар аахпыт дакылаатыгар оскуолаларга эбии үөрэхтээһини сайыннарыы, технологическэй үөрэхтээһини баһылааһыҥҥа үлэни ыытыы биир сүрүн миэстэни ылла.
Кини этэринэн, билигин оскуолаларга, эбии үөрэхтээһин кыһаларыгар аныгы үйэ ирдэбилигэр эппиэттиир мастарыскыайдар тутуллуохтаахтар, политехническэй, профильнай кылаастар, оҕо технопаарката, “Кванториумнара” арыллыахтаахтар.
“Манна өрөспүүбүлүкэҕэ баар тэрилтэлэри, олохтоох нэһилиэнньэттэн үлэлэһиэн баҕалаах дьону түмэ тардар тоҕоостоох. Биһиги өрөспүүбүлүкэбитигэр ити хайысханан үлэлэһии баар. Холобур, Ленскэй 1-кы нүөмэрдээх оскуолата үс сылтан бэттэх “Роснефть-кылааһын” арыйан үлэлэтэр. Былырыын маннык кылаас Мирнэйгэ арыллыбыта. Быйылгыттан Мирнэйгэ “Таас-Юряхнефтегазодобыча” Хотугулуу-Илиҥҥи федеральнай университет Мирнэйдээҕи филиалыгар Политехническэй институкка анал кафедра аһан үөрэтиитин саҕалыаҕа. Маннык көҕүлээһиннэр, мин санаабар, өйөбүллээх буолуохтаахтар. Олохтоох каадырдары промышленноска сыһыарыы бырагырааматын сэргэ, манна туһааннаах бырайыак үлэлиэн наада”, — диэн бэлиэтиир Айсен Николаев.
Уонна түмүгэр технологическэй үөрэхтээһин аҥаардас индустриальнай эйгэҕэ эрэ барыа суохтааҕын этэр. “Технологическэй үөрэхтээһин индустриальнай эйгэҕэ эрэ буолбакка, агро-оскуолаларга эмиэ барыахтаах. Аграрнай эйгэҕэ технологическай үөрэхтээх, идэлээх дьон тахсалларыгар төһүү буолуохтаах”, — диэн иһитиннэрэр кини. Санатан эттэххэ, Айсен Николаев эрдэ агро-оскуолалар, орто, үрдүк үөрэх кыһаларыгар каадыры бэлэмнээһиҥҥэ, тыа хаһаайыстыбатын бородууксуйатын тупсарыыга, хаҥатыыга кэпсэтиилэри, үөрэхтэри тэрийии барыахтааҕын этэн турар.
Аграфена КУЗЬМИНА, “Саха сирэ” хаһыат.
