Бүгүн, кулун тутар 28 күнүгэр, Ил Дархан Егор Борисов улуустар баһылыктарын кытары көрсүһүүгэ Саха Өрөспүүбүлүкэтин ыччат дьыалатыгар уонна дьиэ кэргэн бэлиитикэтин миниистирин Афанасий Владимировы Ил Дархан уонна бырабыыталыстыба ис бэлиитикэтин департаменын салайааччытынан анаабытын иһитиннэрдэ.
Дьокуускайга бэйэни салайыныы Сэбиэтин мунньаҕар, Саха Өрөспүүбүлүкэтин Ил Дархана Егор Борисов бырабыыталыстыба салалтатыгар уларытыылары киллэриэм диэн биллэрбитэ. Ол курдук, ыччат миниистирэ Афанасий Владимиров саҥа дуоһунаска ананна. Маны тэҥэ, Нам улууһун баһылыга Александр Атласов тыа хаһаайыстыбатын уонна ас-үөл бэлиитикэтин миниистиринэн уонна Дьокуускайдааҕы килиэп собуотун дириэктэрэ Денис Белозеров экономика миниистиринэн анаммыттара.
Оттон Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччылара Михаил Осипов уонна Петр Алексеев бэйэлэрин дуоһунастарыгар хаалаллар диэн Ил Дархан бэлиэтээтэ.
