29 Кулун тутар 29.03
  • -12°
  • $ 92,26
  • 99,71

Абый улууһун Ураһалаах нэһилиэгэ кыстыкка бэлэмнэнэр

14:17, 05 сентября 2018
Текст:
Читайте нас на
Яндекс Новости
ЯДВ

Абый улууһун Ураһалаах нэһилиэгэ томороон тымныыга тоҥмот туһугар кыстыкка бэлэмнэнэр. 


Кыстыкка бэлэмнэнии түбүгүн туһунан Ураһалаах нэһилиэгин баһылыга В.В. Новиков кэпсиир.

— Владимир Вадимович, хаһыат ыстаансыйаларыгар нэһилиэнньэ дьарыктаах буолуутугар инники күөҥҥэ иҺэргит сиэрдээхтик сырдатыллыбыта. Аны билигин кыстыкка бэлэмнэнэр үлэлэр үмүрүйбүттэринэн олор тустарынан кэпсиириҥ буоллар.

— Олохсуйбут өйдөбүлүнэн кыстык тиэмэтэ таарылыннаҕына социальнай эбийиэктэри, олорор дьиэлэри сылааһынан хааччыйыы боппуруоҺа турар. Мин да онтон туораабаппын. Өйдүүрүҥ буолуо, нэҺилиэк мунньахтарыгар киин сылытар ситимҥэ ситэри холбоно илик дьиэлээхтэр үгүстүк туруорсалларын. Ааспыт өттүгэр араас төрүөтүнэн ол кыаллыбакка турбута. Дьон кыҺалҕатын туоратыахха диэтэххэ, остуоруйаҕа кэпсэнэр аптаах торуоска хайа да салалтаҕа суох. Ити да буоллар, олохтоохтор этиниилэринэн дьаҺалта кэпсэтиитэ-туруорсуута таах хаалбат. БиҺиги бэйэбит өттүбүтүттэн, матырыйаалынан көмөлөҺөн уонна ОДьКХ филиалын дириэктэрэ Егор Кардашевскай баар балаҺыанньаны өйдөөн-өйөөн, алта олорор дьиэҕэ тас сылытар ситим трассатыгар үлэлэр саҕаланнылар. Онон санаабытын ситиэхпит. Бу үлэни Амматтан силистээх Мичил Кириллин диэн мин солбуйааччым ылсыҺа сылдьар. Эдэр киҺи сүүрэн-көтөн, илиитинэн-атаҕынан салайар үлэҕэ уҺаарыллара эмиэ наада.

Урукку совхоз эргэ гараҺын саҥалыы уларытан нэҺилиэнньэҕэ оҥордубут. Үрдүн көтүрбүппүт, кырыыҺатын уларыппыппыт, эркиннэрин сылытар матырыйаалынан бүрүйбүппүт, ааннарын саҥардыбыппыт. Сылытар ситимин үлэтин, гарааҺы бэйэтигэр ылбыт ИП Петр Борзов оҥорор. Онон тиэхиньикэ турар сирэ баар буолтугар нэҺилиэнньэ үөрүүтэ улахан.

— Истэргэ үчүгэй сонуннар. Аны туран эҺигини энергоэффективнай хантараагынан үлэлэргэ хотуулаахтык киирсэллэр диэн кэпсээн төҺө оруннааҕый?

— Маннык үлэлэри саҕалааҺын кэм-кэрдии ирдэбилэ, ону харах далыттан таҺаарар ончу табыллыбат. Ол иҺин кыҺыҥҥыттан саҕалаан «ЦЭРС» ААО кытта кэпсэтиилэр барбыттара, генеральнай дириэктэр Святослав Поповдуогабар түҺэрсэргэ сөбүлэспитэ. Онон олохтоох дьаҺалта дьиэтигэр, сынньалаҥ киинигэр стеклопакет түннүктэр турдулар. Маны таҺынан олохтоох оскуола эркинэ бүрүйүлүннэ, кырыыҺата уларыйда. Инньэ гынан «ЦЭРС» үс обийиэккэ хаачыстыбалаахтык үлэтин түмүктээтэ. Даҕатан эттэххэ, манна даҕаны, атын да үлэлэргэ бэйэбит нэҺилиэкпит дьонун кытыннаран хамнастыы сатыыбыт.

— Владимир Вадимович, киэҥ сирдэргэ улахан бырайыактарга судаарыстыба уонна чааҺынай бииргэ үлэлээҺиннэрэ далааҺыннанан эрэр. Кытыы сиргэ кыра нэҺилиэккэ манна майгынныыр сатаныан сөп дуо?

— Олохтоох бүддьүөт татымын билэҕин, баҕарбыт иҺин барыта кыаллыбат. Ол иҺин сааскыттан саҕалаан олорор дьиэлэри өрөмүөннээҺиҥҥэ хаҺаайыттары бэйэлэрин кытта бииргэ үлэлииргэ толкуйдаабыппыт. Ити чэрчитинэн Молодежнай уулусса 1, 2 нүөмэрдээх уонна Ефимов уулуссатын 18 нүөмэрдээх түөрт кыбартыыралаах үс дьиэҕэ кырыыҺалар профлииҺинэн сабылыннылар. Матырыйаалын олохтоох дьаҺалта ылбыта, үлэтин хаҺаайыттар оҥорбуттара. ДьаҺалта өттүттэн биҺиги Дьокуускайтан кэлэр транспортнай ороскуотун эмиэ төлөөбүппүт.

Биири этиэм. Олохтоох көҕүлээһиннэри өйүүр бырагыраама толору көдьүүстээҕэ көҺүннэ. Олохтоохтор тиритэ-хорута үлэлээннэр дьоҺуннаах ыҺыахтыыр сири оҥордубут. Уопсайынан да дойду, өрөспүүбүлүкэ үрдүнэн олорор сири тупсарыыга, дьон сылдьарыгар-сынньанарыгар табыгастаах усулуобуйаны тэрийиигэ, баҺаам үлэ ыытылларын хайаан да бэлиэтиэххэ наада. Дьон-сэргэ ону өйдөөтө уонна туруорсара-этинэрэ сиэрдээх буолла. НэҺилиэк иҺинээҕи суолбут мөлтөҕүн иҺин сыллата хамсааҺын таҺаара сатыыбыт. Холобур, Новая уулуссаҕа гравий кутуутун оҥордубут. Кылгастык кэпсээтэххэ итинник. Үлэ-хамнас манан бүпэт, олох салҕанар, түбүк элбэх.

Салгыы Владимир Новиков 2019-2024 сс. хаарбах уонна саахалланар туруктаах дьиэлэртэн көҺөрүү бырагырааматыгар дьүккүөрдээхтик киирсэргэ бэлэмнэнэллэрин быктаран аҺарда. Эрдэттэн күөс өрбөппүт, ону бириэмэ көрдөрүөҕэ.

Ааптар: Афанасий ИВАНОВ.

Хаартыска интэриниэттэн.

Следите за самым важным и интересным в Telegram-канале и WhatsApp-группе ЯСИА