Быйыл Хотугулуу-Илиҥҥи федеральнай университекка уонна филиалларыгар 3943 абитуриент бүддьүөт суотугар үөрэххэ киирэр кыахтаах. Ити 2019 сыллааҕыны кытта тэҥнээн көрдөххө, 11,8 бырыһыанынан элбэх. edersaas.ru ХИФУ пресс-сулууспатыгар сигэнэн суруйар.
Киин тутар хамыыһыйа начаалынньыга Елизавета Ильина иһитиннэрбитинэн, федеральнай бүддьүөт суотугар орто анал үөрэххэ 240 бүддьүөт миэстэтин, бакалавриакка уонна специалитекка 2772, магистратураҕа 727, аспирантураҕа 50, ординатураҕа 154 миэстэни бигэргэппиттэр. Ордук элбэх миэстэ Мэдиссиинэ институтугар көрүллүбүт, ол курдук 404 миэстэ бэриллибит. Математика уонна информатика институтугар – 220, естественнэй наукалар институттарыгар – 328 бүддьүөт миэстэтэ көрүллүбүт.
ХИФУ-ка быйыл квотанан ылыыга 323 миэстэ бэрилиннэ диэн Елизавета Ильина эбэн эттэ. “Квотанан көрүллүбүт миэстэҕэ тулаайах оҕолор, төрөппүт көрүүтэ-истиитэ суох хаалбыт оҕолор, инбэлиит оҕолор, төрүөхтэриттэн инбэлиит оҕолор, I уонна II группалаах инбэлииттэр, бойобуой хамсааһын бэтэрээннэрэ туһаныахтарын сөп”, — диэн бэлиэтээтэ. Квотанан көрүллэр миэстэлэр бакалавриат уонна специалитет бырагырааматыгар эрэ бааллар.
Үгэс быһыытынан ордук элбэх бүддьүөт миэстэтэ “Инженер дьыалата, технологиялар уонна тиэхиньиическэй наукалар” бөдөҥсүтүллүбүт бөлөҕөр киирэр исписээлинэстэр хайысхаларыгар көрүллэр. Бу бары тиэхиньиическэй хайысхалар буолаллар, холобур, тутуу, хайа дьыалата, машиностроение, IT хайысхалар, информатика уо.д.а. диэн Елизавета Ильина чопчулуур. Быйыл бу бөдөҥсүтүллүбүт бөлөххө 1141 миэстэ, ол эбэтэр үрдүк үөрэх бырагыраамаларынан көрүллүбүт уопсай бүддьүөт миэстэтиттэн 30 бырыһыанын ылар.
Педагогическай хайысхаларга 854 миэстэ бэриллибит. ХИФУ-га тус сыаллаах үөрэх миэстэтигэр (целевое обучение) ылыы төһө буолара бу күннэргэ бигэргэниэҕэ диэн эттэ. “Тус сыаллаах үөрэх миэстэтэ ордук медицинскэй идэлэргэ көрүлүннэ. Холобур, ординатураҕа уонна специалитекка 150-чалыы миэстэ”, — диэн Елизавета Ильина эттэ. ХИФУ пресс-сулууспата.
