Өрөспүүбүлүкэ үрдүнэн 19 ойуур баһаарын умуруорууга үлэлэһэллэр, мантан 17-тэ бохсулунна. Уокка 1 511 га сир былдьанна диэн, экология харыстабылын министиэристибэтин пресс-сулууспатыгар сигэнэн, СИА иһитиннэрэр.
Түөрт баһаар Верхоянскай улууһугар, үс – Хаҥалас, икки – Горнай, Орто Халыма, биирдии баһаар – Уус-Алдан, Үөһээ Халыма, Сунтаар, Таатта, Чурапчы, Эбээн Бытантай улуустарыгар турдулар. Ааспыт сууккаҕа Аллара Халымаҕа, Өлүөхүмэҕэ, Орто Халымаҕа, Томпоҕо уонна Уус Майаҕа биэс ойуур баһаарын умуруордулар. Манна 751 киһи, 76 тиэхиньикэ үлэлээтилэр.
Ыраах, киһи тиийбэт ойуурдарыгар 383 563 га иэннээх сирдэргэ 118 уот көрдүгэнэ баара бэлиэтэнэр. Балары космическай сириэстибэлэринэн маныахтара.
Уопсайа сезон саҕаланыаҕыттан 1 737 524 га сиргэ 663 ойуур баһаара бэлиэтэнэр. Мантан уоту умуруорааччылар 9 218 га сиргэ сытар 148 ойуур баһаарын бохсоллор.
