Оскуоланы бүтэрээт даҕаны аармыйаҕа барбыт дьон, кэлээт сылларын халтай сүтэрбэт инниттэн университекка бэлэмнэнии салаатыгар киирэн, саас биир кэлим эксээмэни туттаран, үрдүк үөрэххэ киирэллэрэ үгүс.


ХИФУ-га бэлэмнэнии салаата үлэлээбитэ быданнаата. Үрдүк үөрэххэ киириэн баҕарар дьон чопчу биридимиэттэргэ бэлэмнэнэн, биир кэлим эксээмэни туттараллар. Университет Үрдүк үөрэх иннинээҕи уонна профориентация факультетын декана Светлана Федорова иһитиннэрбитинэн, аармыйа кэнниттэн тута бэлэмнэнии салаатыгар кэлбит дьон босхо үөрэниэн сөп.

Бүддьүөт миэстэтигэр киирэр инниттэн хамандыырдарыттан ирдэбилгэ толору сөп түбэһэр мэктиэ суруктаах кэлэллэрэ булгуччулаах. “Хамандыырдарыттан ылбыт ыспыраапкаларын биһиэхэ аҕалаллар, бэлэмнэнии бөлөххө босхо үөрэнэллэр, ону таһынан 4,5 тыһыынча солкуобай истипиэндьийэ ылаллар”, — диэн декан быһаарда.

Бастакы түһүмэххэ алтынньыттан үөрэнэн баран, кулун тутарга эксээмэн туттараллар. Иккис түһүмэххэ тохсунньуттан бэс ыйыгар диэри үөрэнэллэр. Онон билигин иккискэ кэлиэхтэрин сөп диэн этэр кини.

Бэлэмнэнии бөлөҕөр төлөбүрдээҕи таһынан, сыллата 30 бүддьүөт миэстэтэ көрүллэр. Онно аармыйаттан кэлбиттэр, тулаайахтар уонна инбэлииттэр киирсэллэр.

Бэлэмнэнии бөлөххө үөрэнэр дьон университет бибилэтиэкэтигэр сылдьыахтарын, куруһуоктарга дьарыктаныахтарын сөп, хоту улуустартан кэлбиттэргэ уопсайга миэстэ көрүллэр. Быһатын эттэххэ, устудьуон олоҕунан олороллор.

Людмила ПОПОВА, “Саха сирэ” хаһыат, edersaas.ru

Хаартыска: Ил Түмэн саайтыттан.

0
0
comments powered by HyperComments