Саха сирэ тымныытынан, кустук араас өҥүнэн күлүмүрдүү оонньуур алмааһынан эрэ аатырар буолбатах. Аан дойдуга сэҥээриини таһаарбыт Саха сирин сонуннарын биэс бастыҥын СИА быһаарда.
Джастин Бибер Саха сирин балыксытын «быыһаабыт»
2014 сыллаахха буолбут түбэлтэ аан дойдуну улаханнык сөхтөрдө. Балыксыт Игорь Ворожбицин өрүскэ балыктыы киирэн истэҕинэ хара тыа хаһаайына – эһэ ойууртан сулбу сүүрэн тахсыбыт. Адьырҕа кыыл балыксыкка тииһинэн, тыҥыраҕынан түһэн истэҕинэ эмискэ Игорь төлөпүөнэ тыаһыы түспүт. Төлөпүөҥҥэ Джастин Бибер «Baby» ырыатын кини сиэнэ кыыс туруорбут эбит. Ити эмискэ тыаһаабыт ырыа эһэни улаханнык куттаабыт. Эһэ кутталыттан төттөрү ойуурга куоппут. Игорь төһө да кыыл тииһиттэн, тыҥыраҕыттан эчэйбитин иһин, тыыннаах хаалбыт.
Бу туһунан сонун аан дойдуну тилийэ көппүтэ. Independent, Daily Mail, Inquisitr, IBTimes, New York Daily News, New York Post, Express, о.д.а. таһаарыылар бу туһунан тууһугуран туран бэчээттээбиттэрэ.
Киһи олоҕун уһатар бактерия Саха сиригэр баар
МГУ геологическай факультетын геокриология кафедратын сэбиэдиссэйэ Анатолий Брушков эксперименэ аан дойду болҕомтотун үөһүгэр турбут. Учуонай 3,5 мөлүйүөн саастаах бактерия килиэккэтин олоҕу уһатар диэн ааттаан бэйэтин организымыгар киллэрбит. Ити бактерияны кини 2009 сыллаахха Саха сиригэр ирбэт тоҥҥо Сэлии хайатыгар булбут.
«Кутуйахтарга уонна сахсырҕаларга оҥоһуллубут ситиһиилээх боруобалааһын кэнниттэн ити бактерияны бэйэм эппэр-хааммар киллэрбитим. Маны кутталлаах дии санаабыппын. Тоҕо диэтэххэ, ирбэт тоҥ ууллуутуттан ити былыргы бактерия ууга киирэр. Ону олохтоох дьон иһэ сылдьаллар», — диэн учуонай 2014 сыллаахха кэпсээн турар.
Брушков элбэх интервьютугар сылайбат, хаһааҥҥытааҕар да уһуннук үлэлиир, олус чэбдик буолбутун туһунан эппит. Кэлиҥҥи икки сылга тумуулаан да, тымныйан да көрбөтөх.
Ити түгэн туһунан Siberian Times, Daily Mail, Express, The Telegraph, Huffington Post суруйбуттар. Youtube-ханаалга JustKiddingNews ырыппыттар.
Үрүҥ көмүстэн кутуллубут «Эллэй»
Саха сирин дьахталлара иилээн-саҕалаан, үрүҥ көмүстэн кутан, Леонардо Ди Каприо артыыска анаан оҥотторбут «Эллэй» статуэткалара аан дойду таһымыгар суон сураҕырбыт. Ити туһунан Independent, Daily Mail, BBC News, Vanity Fair, Metro UK, Esquire, Newsweek, Washington Post, New York Daily News, о.д.а.саайтарга тахсыбыт матырыйааллартан көрүөххэ сөп.
Маны барытын көҕүлээччи, саҕалааччы Татьяна Егороваҕа артыыска наҕараадаҕа анаан үрүҥ көмүс оҥоһуктары хомуйар туһунан этии киирбит. Бастаан утаа көр-күлүү курдук саҕаламмыт хамсааһын кэҥээн 1,5 кг ыйааһыннаах, дьиҥнээх Оскарга майгынныыр, ол эрээри монголоид сирэйдээх, илиитигэр чороону тутан турар статуэтка оҥоһуллан тахсыбыт.
Ураһаҕа майгынныыр мас хоруопка оҥорон артыыска ыыппыттара.
Быйыл кулун тутарга Ди Каприо Инстаграмҥа норуот наҕараадатын хаартыскатын таһаарбыта уонна Саха сирин дьахталларыгар махтаммыта.
Саха сирин дьоно-сэргэтэ -50 кыраадыс тымныыга олорор
-50 кыраадыс тымныыга саха дьоно көннөрү таһырдьы сылдьар хаартыскалара аан дойду дьонун улаханнык сөхтөрөр. Дьон санаатын этэригэр сөҕөрүн-махтайарын кистээбэт. «Күһэйииттэн буолбакка, бэйэлэрин баҕаларынан итиннэ олороллор дуо?», — диэн ыйытыгы кинилэр туруораллар. Саха сирин томороон тымныытын туһунан элбэхтэ суруллар да, көрдөрүллэр да. Бу туһунан YOUTUB, Sebastian Balders, George Makharadze, Taramaan, Geoffmackley, Robert Ratliff, Mikael Strandberg, о.д.а. булуохха сөп.
Кырачаан Карина – болҕомто үөһүгэр
Өлүөхүмэ Олом сэлиэнньэтин кырачаан олохтооҕо Карина Чекитова ойуурга 11 суукка устатыгар муна сылдьан баран тыыннаах хаалыыта аан дойдуга аатырда. Кинини өрүс таһыгар, барбыт сириттэн 6 км. ыраах булбуттара. Тоҥмут, аччыктаабыт, ырбыт, ол эрээри тыыннаах Карина хойуу от быыһыгар аттыгар буолары куттана көрө олороро.
Маугли кыыс туһунан элбэхтэ кэпсээбиттэрэ, дьон санаатын үллэстибитэ, сөхпүтэ-махтайбыта. Ол туһунан английскайдыы тыллаах Daily Mail , Siberian Times, Mirror, Huffington Post, Independent, The Telegraph, New York Daily News, IBTimes, Express суруллубута, этиллибитэ. Киһи ааҕан сиппэт тылыгар тылбаастаммыта.
Биллэрин курдук, Каринаны кытта кини ыта баара. Оҕо тыыннаах хааларыгар бу ыт суолатат кырата суох буолуон сөп. Каринаҕа анаммыт бэлиэҕэ ыты эмиэ оҥорбуттара хайҕаллаах.
