Нэһилиэктэр билигин Ил Түмэнинэн анал сокуон таһаартаран бэйэлэригэр арыгы атыытын бопсуохтарын сөп. Маннык сокуонунан билигин хас да нэһилиэк туһанан олорор. Бүгүн кинилэр ахсааннарыгар өссө аҕыс нэһилиэк эбилиннэ.
Чурапчы Чыаппаратыгар, Хатылытыгар, Мындаҕаайытыгар, Таатта Чөркөөҕөр, Томпо Кэскилигэр, Амма Соморсунугар, Орто Халыма Арҕахтааҕыгар, Дьааҥы Боруулааҕар арыгы атыыта сокуонунан бобулунна.
Ил Түмэн пленарнай мунньаҕар Болугур нэһилиэгин баһылыга Анна Флегонтовакинилэргэ арыгы атыыта 2006 с. бобуллубут эрээри, анал сокуонунан бигэргэтиллэ илигин бэлиэтээн туран, оҕо-аймах, ыччат инники кэскилигэр олохтоохтор биир санааны ылыммыттарын эттэ. Билигин нэһилиэккэ 916 киһи олорор. Ол иһигэр 330 оҕо.
Оттон Таатта улууһун Октябрьскай нэһилиэгин баһылыга Михаил Аржаков Чөркөөх өрөспүүбүлүкэ биир киэн туттар сирэ буоларын этэн туран, нэһилиэнньэ чөл олоҕу көҕүлээһиҥҥэ араас үлэни ыытарын иһитиннэрдэ. Ол курдук, 2005 с. уопсастыбаннай түмсүүлэр быһаччы кыттыыларынан нэһилиэк чөл олоҕу көҕүлүүр тирэх киин буолбута. Арыгы атыыта хааччахтаныллан, күнүс иккиттэн киэһэ биэскэ диэри атыыланара көҥүллэммитэ. Оттон арыгы атыылыыр сирдэргэ хааччах киириэҕиттэн нэһилиэккэ атыыламмат буолбута. “Кэнники сылларга нэһилиэккэ эдэр ыал элбээтэ. Дьон-сэргэ спордунан дьарыктанар буолла, нэһилиэк күннээҕи олоҕор актыыбынайдык кытталлар. Аҕыйах сыллааҕыта уопсастыбаннай түмсүүлэрбит төрдүө эбит буоллахтарына, билигин аҕыс түмсүү үлэлиир”, — диэн бэлиэтиир Михаил Аржаков.
