Дьокуускай куорат балыыһатыгар үлтү кырбаммыт 63 саастаах киһини киллэрбиттэр. Маннык түбэлтэлэргэ ирдэбил быһыытынан, быраастар полицияҕа биллэрэллэр.
Полиция тутатына бэрэбиэркэ саҕалаабыт. Ол түмүгэр биллибитинэн, аҕатын ити үлүгэрдик бэйэлээх бэйэтин оҕото — 35 саастаах уола — кэбилээбит. Уорбаланааччыны оперативниктар түргэнник туппуттар.
Барыллаан быһаарыынан, уорбаланааччы аҕатынаан бииргэ олороллор эбит. Маннык иэдээн төрүөтүнэн 3 хостоох кыбартыыра буолбут.
Бу сааһа балачча ырааппыт «уол» ханна да үлэлээбэккэ, аҕатын биэнсийэтигэр олорор эбит. Ол да буоллар, туспа барыан баҕаран, дьиэни атыылаан, икки гыныахха диэн аҕатыгар куруук этэрин, аҕата ончу сөбүлэспэт эбит. «Кэлин мин суох буоллахпына, кэргэннэннэххинэ, киэҥ дьиэ наада» диэн быһаарар эбит.
Биир күн уола итирэн кэлэн баран, аҕатын итинтэн сылтаан, улаханнык кырбаабыт — сыҥааҕын тоһуппут, этин-сиинин бүттэтэ суох көҕөрдүбүт.
Бу чахчынан «Доруобуйаҕа орто ыарахан эмсэҕэлээһини оҥоруу» ыстатыйанан холуобунай дьыала тэриллибитин СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.
