Арыгы атыытын хааччахтааһын киллэриллибитин, туһааннаах сокуоннар ылыллыбыттарын кэннэ туох уларыйыылар тахсыбыттарын туһунан куорат дьаһалтатыгар чөл олоххо анаммыт мунньахха дьүүллэстилэр. Чуолаан инникитин өссө туох дьаһаллары ылыахха сөбүн туһунан киэҥ кэпсэтии буолла.
– Нэһилиэнньэҕэ арыгылааһын элбээһинин сонуну киэҥник тарҕатар сириэстибэлэри туһанан бопсуохха эмиэ сөп. Биир өттүттэн ыллахха, сокуоннары, ол иһигэр арыгыны атыылааһыны хааччахтааһыны туһаныахха сөп. Өссө биир көдьүүстээх ньыманан чөл олоҕу тарҕатыы, арыгы буортутун туһунан лекциялары тиһигин быспакка ыытыы, спорду тарҕатыы буолаллар. Оччоҕо эрэ түмүктээх буолуоҕа. Аҥардас хааччахтааһынан элбэҕи ситиспэккин, – диэн арыгы атыытын хонтуруоллуур судаарыстыбаннай управление салайааччыта Матвей Лыткин куорат дьаһалтатыгар ыытыллыбыт чөл олох мунньаҕар иһитиннэрдэ.
Арыгылааһыны утары охсуһуу түмүктэрин билиһиннэрии кэнниттэн Дьокуускай к. баһылыгын иһинэн чөл олоххо сүрүннүүр сэбиэти тэрийии боппуруоһун быһаардылар. Ол курдук, куорат оскуолаларыгар уонна үөрэҕин тэрилтэлэригэр психоактивнай веществолары сэрэтиигэ доруобуйа култууратын уруоктара ыытыллыахтара. Онуоха учууталлары бэлэмнииргэ педагогическай наука кандидата, протоиерей Игорь Бачинин уонна п.н.к. Наталья Гринченко кэлиэхтэрэ.
Дьокуускай куорат 27 №-дээх оскуолатыгар уонна Хатас с. оскуолатыгар чөл олох икки тирэх былаһаакката баар буолуоҕа. Поликлиникаларга дьахтар консультацияларыгар уонна педиатрия отделениеларыгар чөл олох үтүө өрүттэрин сырдатар истиэндэлэр ыйаныахтара.
