Аҕалар иккис сийиэстэрин дэлэгээттэрэ бэйэлэрин санааларын үллэстэллэр, диэн иhитиннэрэр edersaas.ru.
Алексей Руфов, Үөһээ Бүлүү улууһун Аҕа сэбиэтин бэрссэдээтэлэ:
— Бастакы сийиэскэ эмиэ үлэлэспитим. 10 сыл устата олоххо туох киирбитин ааҕыахха баара. Министиэристибэлэр, биэдэмэстибэлэр өттүлэриттэн толоруу ситэтэ суох. Иккис сийиэскэ эдэр аҕалар кэлбиттэрэ, дэлэгээттэр сахалыы таҥнан-симэнэн кэлбиттэрэ үөртэ. Аныгыскы сийиэскэ бары да сахалыы таҥнан кэлэрбит буоллар! Этиилэр олоххо сыһыаннаахтар, холобур, бырайыагынан үлэҕэ барыахха дииллэрэ оруннаах. Хамсааһыны таһаарар курдук, Аҕалар сэбиэттэригэр Ил Дархан гранын олохтуур сөп.
Иван Муксунов, Хамаҕатта нэһилиэгин (Нам) баһылыга:
—Биһиэхэ эр дьону түмэр “Эркин” түмсүүбүт 2013 сыллаахха тэриллибитэ. Манна эдэр уолаттартан саҕалаан ытык кырдьаҕастарга тиийэ кытталлар. Нэһилиэкпитигэр 2017 сылы Аҕа сылынан биллэрбиппит. Бырагыраама ылынан, үлэлии сылдьабыт. Элбэх эр дьон үлэһиттээх улахан тэрилтэлэрбитин, түөлбэлэри кытта ыкса үлэлиибит. Аҕа уонна уол оҕо күрэһэ дьону сэргэхситэр. Соторутааҕыта улуус таһымнаах аҕа кэмпириэнсийэтин ыыппыппыт, дэлэгээттэри талбыппыт. Мин туруорсуум: өрөспүүбүлүкэтээҕи “Далбар Хотун” диэн куонкурус курдук, эр дьоҥҥо, аҕаларга анаммыт күрэс баара буоллар.
Семен Черноградскай, “Оһуохай” уопсастыба бэрэссэдээтэлин солбуйааччы, Аан Дархан этээччи:
— Оһуохай тылын таһаарарбар аҕа оруолун хайдах үрдэтэр, эр дьон сүрүн көтөҕөр туһунан алгыс, сүбэ тыллары анаатым. Ол эрээри, үгүс дэлэгээттэр, ол иһигэр чыыннаах-хааннаах дьон эмиэ, түһүлгэҕэ киирбэккэ, таһынан ааһа турбуттара хомотто. Мин санаабар, норуот ахсаан өттүнэн элбииригэр, оҕону үлэҕэ үөрэтэргэ, дьиэ кэргэҥҥэ аҕаҕа сүгүрүйүү баар буоларыгар туһаайан үлэ барыахтаах.
