Өрөспүүбүлүкэбит күнүгэр Доҕордоһуу болуоссатыгар дьэ чахчы олоҕурбут ньыманнан дьиҥ сахалыы тыыннаах төрүт үҥкүү-оһуокай дьону бүттүүн түмэ тарта.
Манна саха норуотун фольклорун үөрэтэр, сэргиир, ытык-мааны дьоммут, республикаҕа киэҥник биллибит Дархан этээччилэрбит, тарҕатааччыларбыт, уһуйааччыларбыт төрүт үҥкүүбүтүн — оһуокайы оройуттан туттулар. Бу өрөгөйдөөх күҥҥэ аан бастакынан Алгыс тардыылаах оһуохайы бар дьонугар анаан, 92 саастаах ытык кырдьаҕас Дархан этээччи Осипов Егор Михайлович саҕалаан Алгыс тылын бар дьонугар, эдэр ыччаттарга анаан дьиҥнээх ис турукка киирэн, оһуордаах тылынан тута хоһуйан балайда уһуннук эппитэ киэҥ сэҥээрини ылла, ураты болҕомтону тарта. Ону сиэтэ 86 саастаах Дархан этээччи Алексеев Афанасий Егорович үҥкүү тылын салҕыы этэн дуораһытта.
Бу үтүө күҥҥэ аҕа саастаах ытык кырдьаҕастарбыт күн бүгүҥҥэ диэри норуот тылынан уус-уран айымньытын ураты көрүҥэ — оһуокай ис тыынын, тылын — өһүн, хамсаныытын эттэригэр-хаанарыгар иҥэринэн, өйдөрүгэр-санааларыгар илдьэ сылдьаллара үтүөҕэ-кэрэҕэ угуйар. Ол эбэтэр норуот төрүт үҥкүүтэ — Оһуокай ураты суолталааҕын, киһи этигэр-хааныгар, ис туругар, доруобуйатыгар дьайар, киһини эмтиир күүстээҕин, норуоту түмэр ураты суолталааҕын кэрэһэлиир. Эдэрдиин-эмэниин, дьахтардыын, эр дьоннуун Өрөспүүбүлүкэбит күнүгэр анаммыт оһуокайбыт икки чаас устата тохтообокко салҕанан бара турбута оһуохай саха таптыыр, ытыктыыр үҥкүүтэ буоларын өссө төгүл чопчулуур.Үгүс-элбэх дьон-сэргэ түмсэн биир турукка киирэн, астына-дуоһуйа үнкүүлээтилэр, дьэ кырдьык даҕаны дьиннээх оһуокай бу буолар дэһэн кэпсэтэллэрэ, махтаналлара элбэххэ эрэннэрэр.
Бу саҥа тэриллибит Өрөспүүбүлүкэтээҕи Оһуокай Ассоциацията бу курдук өрөспүүбүлүкэҕэ баар бары улуустааҕы куораттааҕы оһуокай түмсүүлэрин иилээн-саҕалаан биир сиргэ кииннээн үлэтин саҕалаабыта норуоппут инники сайдыытыгар кэлэр кэнчээри ыччакка сөптөөхтүк тиэрдиигэ туһуламмыта хайҕаллаах. Саха Өрөспүүбүлүкэтин култуураҕа уонна духуобунай сайдыыга миниистирэ В. И. Тихонов бу саҥа тэриллибит Өрөспүүбүлүкэтээҕи Оһуокай Ассоциацията бастакы тэрээһинэ ситиһиилээхтик ааспытынан махтанан туран норуоппут инники сайдыытын түстүүр, бүттүүн түмэр төрүт Оһуокайбыт үйэттэн үйэҕэ сүппэккэ симэлийбэккэ сайда турарыгар биир сомоҕо күүс буоларбыт биһиги ытык иэспит диэн бэлиэтээтэ.
Култуура министиэристибэтин пресс-сулууспата.
