Сыл кэриҥэ хааччахха хааллан олорбут дьон-сэргэ сэрэнэн-сэрбэнэн тэтимнээхтик үлэлииргэ, сааскы халлаанныы сырдаан айыан-тутуон баҕарар. Бу күннэргэ Сунтаар биир чаҕылхай «Сулускун тал» бырайыага түмүктүүр түһүмэҕэр сыыйа чугаһаатар-чугаһаан иһэр. Бырайыакка ырыаны таптааччы, ырыаҕа холонооччу 12 киһи кыттар. Кинилэр кимнээҕий, тугу гыналларый?
Аллыҥа, Элгээйи, Кутана, Кэмпэндээйи уонна Сунтаар нэһилиэктэриттэн ырыаны доҕор оҥостубуттар «Сулускун тал» бырайыакка кытталлар. Бэйэлэрин идэлээх үлэлэрин, үөрэхтэрин кытта тэҥҥэ ырыаны өрө туталларын кинилэр кэпсииллэр.
Конкурус чэрчитинэн куйаар ситимин нөҥүө киэҥ эйгэҕэ талааннарын билиһиннэрэллэр. Толорууларын видеоҕа устан ыыталлар, онно дьон куоластыыра олус долгутуулааҕын этэллэр.
5-с сылын ыытыллар бырайыак.
Дьону-сэргэни сэргэхситэр «Сулускун тал» бырайыак СӨ култууратын туйгуна Юлия Сергеевна Филиппова салайыытынан саҥалыы тыыннанан, уруккулардааҕар уратылардаах. Кыттааччылар билигин вокалга, сценаҕа туттарга-хаптарга эрчиллэн, сорох маҥнайгытын профессионал фотографка түһэн, тылы-өһү эрчийэн о.д.а. эҥин араас тургутуктары, бэйэлэригэр туох эрэ саҥа уопуту ылаллар, сайдаллар. Үс уһуйааччы бэйэтин бөлөҕөр баар кыттааччыны дьарыктаан, буолаары турар «галаҕа» бэлэмниир.
Сунтаардааҕы Оҕо искусствотын оскуолатын (дир. А.К.Степанов) «Сулускун тал» бырайыагын кыттааччыларын талааннарын инстаграм нөҥүө күннэтэ маныыллар-кэтииллэр, хас биирдиилэрэ сүгүрүйээччилэрдээхтэр.
Бырайыак ырыаҕа холонооччуларга эрэ буолбакка тэрийээччилэргэ, уһуйааччыларга туох эрэ ураты саҥаны-сонуну биэрэр. Маныаха маарынныыр бырайыагы аны эстрада театра тэрийэн, ырыаһыттар эмиэ сүүмэрдэммит кыттааччыларга уһуйааччылаан, саҥа талааннары арыйаллар.
Сунтаардар кулун тутар 27 күнүгэр Сунтаар саҥа сулустарын долгуйа кэтэһэллэр.
Оҕо искусствотын биир саамай сэргэх “Сулускун тал” бырайыагын сиһилии @suntardshi инстаграм сирэйигэр киирэн көрүҥ, кэрэхсээҥ!
