Саха сирин үрдүнэн, төһө да уһун кэмнээх ардах мэһэйдээтэр, дьон окко таҕыста. Мэҥэ Хаҥалас, Сунтаар, Уус Алдан, Кэбээйи, Чурапчы, Бүлүү, Үөһээ Бүлүү улуустарын оттооһуҥҥа көрдөрүүлэрэ үчүгэй.  


Үгүлээт нэһилиэгэр окко былаан 800 тонна 

Мандаров Владимир Иванович 1 группалаах инвалид (аҥаар илиитэ суох):
Тоҕус сүөһүлээхпит. Быйыл дьыл үчүгэйдик кэлбэккэ оппутугар саҥа киирэн эрэбит. Үс кээһиилээхпит. Өссө да аҕыс оту туруордахпытына дьыл кыстыыбыт. Оппут үүнүүтэ быйыл мөлтөх соҕус: сорох сири уу ылбыт, сороҕо кууран хаалбыт. Нэһилиэк дьоно манна бары илиинэн оттуубут былыргылыы. Техника кыайан охсубат сирдэрэ: кута, маар, дулҕа. Улахан алаас сир суох. Оппутун ийэбин кытта кыттыһан оттуубут. Ийэм Анастасия Афанасьевна 78 саастаах, тоҕус сүөһүлээх бэйэтэ көрөр, чугастааҕы сирдэри бэйэтэ оттуур. Үүппүтүн тута арыы сыаҕар туттарабыт.
Болуодьа бэйэтэ охсор, мунньар, бугуллуур. Күҥҥэ 80 бугулу туруорар. Ынаҕын ыыр, дьиэ иһинээҕи үлэни барытын толорор.

Сунтаарга Хочо өттүлэрэ окко киирдилэр

Сунтаар улууһугар дьон от ситэ үүнэрин, ардах ааһарын кэтэһэр. Элбэх сүөһүлээх эрээри кыра нэһилиэктэртэн Аллыҥа, Тэҥкэ тиэтэйбэттэр. Холобур, Аллыҥаҕа 4 киһи, Тэҥкэҕэ 6 киһи ходуһаҕа киирбиттэр. Улуус үрдүнэн көрдөххө, Хочо өттө ордук турунан эрэр: дьаарханнар, арыылаахтар, тойбохойдор отторун охсубуттар. Өрүс уҥуор нэһилиэктэртэн Элгээйи дьоно ходуһаҕа хото киирбиттэр. Оттон былырыын баччаҕа улуус үрдүнэн 892 т от кэбиһиллибит эбит буоллаҕына, быйыл 516 т от күрүөнү булбут.

Уус Алдан II-с Лөгөйүгэр кырдьаҕастар оттоон ыраатыннардылар

 

Уус Алдан улууһун II Лөгөй нэһилиэгин дьаһалтатын тыа хаһаайыстыбатыгар специалиһа Петр Бурнашев иһитиннэрбитинэн, олохтоохтор ходуһаҕа таҕыстылар.
Быйыл нэһилиэк үрдүнэн окко былаан 1320 тонна. Үүнүү куһаҕана суох. Оттооһун хампаанньатыгар нэһилиэк үрдүнэн уопсайа 94 араас маркалаах техника, 120 отчут киһи алаас, үрэх ходуһаларыгар окко тахсыахтара.

Биэс ыанар ынахтаах Матвей Новгородов бэлиэр 10 тонна оту оттоон, сыл тахсар отун булунна. Хотуурун эһиилги дьылга диэри ампаарыгар ыйаата.

Оттон Хаҥкырыкы Үрдэ диэн сиргэ сылгыларыгар анаан оттуу сылдьар 70 саастаах Моисей Литвинцев бу курдук кэпсээннээх: «Эппин үөрэтэ таарыйа, чугас сытар хааччахпыттан саҕалаатым. Ээ, хааччаҕым үүнэ сатаан баран, сыппыт, киһи баһар ото үүммүт. Биир үчүгэй оту ыларым буолуо. Ардах түспэтэҕинэ, икки-үс хонугунан хомуйуом. Айылҕабыт даҕаны киһи билбэт гына уларыйда түүнүн тымныйан от үүнүүтэ бытаан эрээри, төрдө хойуу».

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.