М.К.Аммосов аатынан ХИФУ күннэрин чэрчитинэн муус устар 8 күнүгэр улуус дьаһалтатыгар «төгүрүк остуол» ыытылынна. «Төгүрүк остуолга» университеттан гуманитарнай үөрэхтээһин уонна корпоратив бэлиитикэтин проректора, биир дойдулаахпыт Надежда Зайкова, технология институтун дириэктэрэ Алексей Бессмертнай, ХИФУ иһинэн Дьокуускайдааҕы глобальнай университет дириэктэрэ Леонид Давыдов, устудьуоннары сайыннарар киин салайааччыта Людмила Уварова, суол-иис факультетын деканын солбуйааччы Виктор Крылов уо.д.а., ону сэргэ улуус баһылыгын социальнай боппуруостарга солбуйааччы Иван Птицын, управление салайааччылара, нэһилиэк баһылыктара кытыннылар.
Ыалдьыттар университет улуустарга тахсан үлэлиир бырайыага биһиги улууспутуттан аан-бастакытын саҕаламмытын иһитиннэрдилэр. Быйылгы үөрэх дьылын улуустан 180 устудьуон бүтэриэхтээх. Күн-бүгүн 12 атын улуустан сылдьар ыччат Мэҥэ Хаҥаласка үлэлии кэлэр баҕатын биллэрбит.
Надежда Михайловна университеты бүтэрбит эдэр исписэлиистэргэ наадыйар нэһилиэктэр баһылыктара университет иннигэр туруорбут соруктара төһө туолбуттарын иһитиннэрдэ. Ол курдук, Бэдьимэҕэ омук тылын бүтэрбит учуутал быйыл булуллубатаҕын, иитээччи кэлэрин, оттон доруобуйа харыстабылын үлэһитэ 2017 сылга бүтэрэн кэлиэхтээҕин, Бүтэйдээххэ хореограф идэлээҕи, психологы, социальнай педагогу, физкультура учууталын булбуттарын, оттон тиэхиник идэлээх көстүбэтэҕин, Дьаҥхаадыга Алдан коллеһын бүтэрэн кэлиэхтээх биэлсэр, «Солооһун» ТХПК-ҕа зоотехник булуллубуттарын, ол эрээри Төхтүрдээҕи ускуустуба оскуолатыгар баяҥҥа, домраҕа, фортепьяноҕа үөрэтээччилэр биллибэтэхтэрин, I-Тыыллыма нэһилиэгэр математика, нуучча тылын учууталлара, култуура киинигэр уонна Хараҕа «Айыллаан» кииҥҥэ уус-уран салайааччылар үлэлии кэлиэхтээхтэрин туһунан эттэ.
Улууска 4 быраас, 10 биэлсэр, тыа хаһаайыстыбатыгар 14, култуураҕа 21 бакаансыйа тахсыбытын эттилэр. Үөрэх эйгэтигэр кэнники үс сылга 122 ыччат, кинилэртэн 93 эдэр учуутал ХИФУ-ну бүтэрбиттэр. 23 эдэр үлэһит ипотеканы туһанан толору хааччыллыылаах дьиэнэн хааччылыннылар. Оскуолаларга физика, математика учууталлара, хореограф тиийбэттэрин эттилэр. Эдэрдэргэ үөрэх эйгэтигэр орто хамнас 30 тыһыынча 513 солкуобайга, кэккэ кыра комплектаах оскуолаларга 21 тыһыынча солкуобайга тэҥнэһэр.
Хара нэһилиэгин баһылыга Дария Назарова тутуу матырыйаалын оҥорорго аналлаах сир баарын эттэ, онуоха университеты кытта бырайыак оҥорон кэнэҕэскитин сайыннарыахха сөптөөх хайысха эбит диэн быһаарда. Итиниэхэ майгынныыр сир I-Наахара нэһилиэгэр баарын туһунан баһылык Михаил Денисов эттэ. Чычаастык сытар боруодалары үрдүттэн хаһан ылар сирдэри үөрэтэн туһаҕа таһаарар бырайыакка бэлэммит диэтэ.
Интерн-быраас, Аллараа Бэстээхтэн төрүттээх Евгения Аксютич бөһүөлэккэ дьахталлар доруобуйаларын көрөр төлөбүрдээх өҥөнү оҥорор киини үлэлэтиэн баҕарарын туһунан эттэ. Онуоха улуус өртүттэн үлэлиир дьиэнэн хааччыйыыга көмөлөһөллөрүгэр эттэ. Быйыл физкультура институтун бүтэриэхтээх Александр Васильев Бүтэйдээххэ учууталынан ананан барарын туһунан эттэ. Кини ‒ «Дойду» Мэҥэ Хаҥаластан төрүттээх устудьуоннар түмсүүлэрин салайааччыта. Эдэр үлэһит улууска үлэлии кэллэҕинэ уопсастыбаннай үлэҕэ күүскэ үлэлэһиэҕим диэн былаанын кэпсээтэ.
Бу кэнниттэн Иван Птицын уонна Надежда Зайкова улуус университеты кытта исписэлиистэри бэлэмнииргэ уонна үлэнэн хааччыйыыга бииргэ үлэлэһии туһунан дуогабарга илии баттастылар.
