Суотабай сибээс тарыыба 2020 сылга 10-25% үрдүөн сөп диэн сыананы кэтээн көрөр аналитиктар этэллэр.
Оператордар сыананы үрдэтэн дойду иһинээҕи роуминг сотуллубутун түмүгэр, дохуоттарын сүтэрбиттэрин толуйуохтара. Итиэннэ тэрили атыылаһарга дуоллар куурса үрдээбитин, абоненнар трафигы ороскуоттуур видеосервистары, араас сыһыарыылары маассабайдык туһанар буолбуттара ыйыллар. Ону таһынан, уот сыаната, хомунаалынай өҥө тарыыба эмиэ сыл ахсын үрдээн иһэрэ төрүөт буолара бэлиэтэнэр. Ол туһунан «Известия» хаһыат сайта уонна информационнай ааҕыныстыбалар иһитиннэрэллэр.
Суотабай сибээс оператордара баар тарыыптар сыаналарын билиҥҥитэ үрдэтэ иликтэр. Онон аналитиктар сабаҕалааһыннара хаһан олоххо киирэрин бириэмэ көрдөрүө.
«Саха сирэ», edersaas.ru
