Бу күннэргэ Үөрэҕи уонна науканы кэтээн көрөр федеральнай сулууспа саайтыгар, 2020 сыллааҕы эксээмэннэр араспысаанньаларын Арассыыйатааҕы юстиция министиэристибэтэ регистрациялаата диэн иһитиннэрэллэр, диэн “Саха сирэ” хаһыат, edersaas.ru суруйар.
Араспысаанньаны көрдөххө биир кэлим эксээмэн (ЕГЭ) өрүү буоларыныы үс түһүмэҕинэн ааһар. Сүрүн түһүмэх иннинээҕи (досрочный) кулун тутар 20 – муус устар 13 күннэригэр, сүрүн түһүмэх (основной) ыам ыйын 25 – бэс ыйын 29 күннэригэр итиэннэ эбии түһүмэх (дополнительный) балаҕан ыйын 4-22 күннэригэр барыаҕа.
11-с кылаас кэнниттэн нуучча тылын, математиканы (судургутутуллубут, уустугурдуллубут) таһынан, ханнык үрдүк үөрэххэ туттарсалларынан салайтаран, эбии биридимиэттэри талан туттараллар. Сүрүн судаарыстыбаннай эксээмэни (ОГЭ) 9-с кылааһы бүтэрээччилэр туттараллар. Тустаах эксээмэн эмиэ үс түһүмэҕинэн барар. Ол курдук, сүрүн түһүмэх иннинээҕи (досрочный) муус устар 21 – ыам ыйын 16 күннэригэр, сүрүн (основной) ыам ыйын 22 – бэс ыйын 30 уонна эбии түһүмэх (дополнительный) балаҕан ыйын 4-18 күннэригэр буолуоҕа.
9-с кылааһы бүтэрэр оҕолор нуучча тылын, математиканы (булгуччу) уонна эбии икки биридимиэти талан туттараллар. Инньэ гынан, уопсайа, түөрт биридимиэккэ эксээмэн туттараллар.
Санатан эттэххэ, оскуоланы урукку сылларга бүтэрбиттэр биир кэлим эксээмэни (ЕГЭ) сүрүн түһүмэх иннинэ (досрочный период) уонна сүрүн түһүмэх саппаас (резервэҕэ) күннэригэр, оттон быйыл бүтэрээччилэр сүрүн түһүмэххэ (основной период) туттараллар.
Биир кэлим эксээмэҥҥэ (ЕГЭ) кыттар туһунан сайабылыанньаны 2020 сыл олунньу 1 күнүгэр диэри, оттон сүрүн судаарыстыбаннай эксээмэҥҥэ (ОГЭ) кыттар сайабылыанньаны 2020 сыл кулун тутар 1 күнүгэр диэри ылаллар. Эксээмэннэр (ЕГЭ, ОГЭ уонна ГВЭ) араспысаанньаларын сиһилии http://ege.edu.ru/ru/ уонна http://gia.edu.ru/ru/ саайтарга көрүөххүтүн сөп.
