Спорт министиэристибэтэ физическай култуураҕа уонна спортка 2019 сыл түмүгүнэн бастыҥ деятеллэри ааттаталаата. Өрөгөйдөөх тэрээһин биэдэмистибэ кэллиэгийэтигэр ыытылынна.
Спорт миниистирэ Иннокентий Григорьев хапсаҕайга Федерация дириэктэрэ Алексей Мостаховка спортка үтүөлэрин иһин диплом туттарда. ГТО-ну бастыҥ тэрийээччинэн Алдан куорат «Энергетик» спортивнай-чэбдигирдэр комплекс дириэктэрэ Максим Скупой ааттанна. Бильярд спордун Федерациятын президенэ Альберт Алексеев «Бастыҥ уопсастыбаннай спортивнай тэрийээччи» номинация лауреата буолла.
2019 сылга үрдүк таһымҥа мас тардыһыытыгар аан дойду Кубогын үс этааба ааста. Мас-рестлиҥҥа норуоттар икки ардыларынааҕы Федерация (салайааччыта Александр Акимов) «Бастыҥ спортивнай уопсастыбаннай тэрилтэ» буоллулар. «Бастыҥ спортивнай судьуйа» бирииһи маска норуоттар икки ардыларынааҕы категориялаах арбитр Егор Ермолаев ылла.
Сайын Амма улууһугар Саха сирин норуоттарын спартакиадалара буолбута. 3000-тан тахса спортсмен кыттыбыта. Үрдүк тэрээһинин иһин Николай Архипов баһылыктаах муниципальнай тэриллии бастыҥынан ааттанна.
«Бастыҥ спортивнай суруналыыс» иккис төгүлүн Александр Посельскай, «Спорт Якутии» хаһыат. «Сыл арыйыыта» номинация аан дойду рекордсменыгар, трикиҥҥэ сальтоҕа биэс эргиири оҥорбут Гаврил Даниловка бэрилиннэ.
Санатар эбит буоллахха, Саха сирин бастыҥ спортсменнарын ааттарын НВК «Саха» ханаалга ахсынньы 21 күнүгэр норуот куоластааһынын түмүгүнэн этиэхтэрэ.
