«Саха сирин киэн туттуута» бириэмийэ «Норуот маастара» номинациятыгар сайаапкалары хомуйуу саҕаламмытын туһунан иһитиннэриини үгүс дьон интэриэһиргээтилэр уонна кэккэ боппуруостары сиһилии быһааран биэрэрбитигэр көрдөстүлэр.
Дьэ, онон сайаапкалары түһэриигэ дьон мунаарбыт ыйытыылара ханныктарый? Ыйытыкка хоруй тута бэриллиэҕэ.
- Куонкуруска «Норуот маастара» диэн ааттаах-суоллаах эрэ дьон кытталлар дуо?
- Норуот төрүт үгэһин, духуобунай сыаннаһын үйэтитэргэ анаан үлэлэһэр, уус-уран оҥоһугунан дьарыктанар ханнык баҕарар айар эйгэҕэ (иистэнньэҥ, тимир, мас ууһа, муосчут уо. да. а.) үлэлэһэр ким баҕалаах бары кыттыан сөп. «Норуот маастара» диэн ааттаах-суоллаах эрэ дьон кытталлар диэн ирдэбил турбат.
- Сайаапканы ким түһэрэрий?
- Сайаапка айар куттаах дьон аймахтарыттан, табаарыстарыттан, уопсастыбаннай тэрилтэлэртэн, искусство кииннэриттэн уонна култуура управлениеларыттан киириэн сөп. Хааччахтааһын суох.
- Кыттааччы сааһа учуоттанар дуо?
- Куоластааһыҥҥа 18-тан үөһэ саастаах киһи кыттар.
- Сайаапканы ханна, кимиэхэ ыытабытый?
- Сайаапканы gordost-yakutii@mail.ru электроннай почтаҕа ыытаҕыт. Сайаапкаҕа хайаан да 500 х 760 кээмэйдээх кыттааччы хаартыскатын угаҕыт. Хаартыска куоластааһын кэмигэр билиһиннэрии быһыытынан YSIA.RU саайтка тахсыаҕа.
- Сайаапканы ылыы хаһан түмүктэнэрий?
- Сайаапканы ыам ыйын 11 күнүгэр диэри ылаллар.
- Куоластааһын хаһан саҕаланарый?
- Ыам ыйын 14 күнүттэн бастыҥы быһаарар куоластааһын саҕаланар.
Куоластааһыҥҥа кыайбыт «Норуот маастара» номинация дьоруойун аата ыам ыйын 25 күнүгэр биллиэҕэ.
Саха норуотугар «Норуот маастара» курдук ааттаах-суоллаах үгүс киһи, бука, суоҕа буолуо. Кытаатыҥ, билэр дьоҥҥутун бу суолталаах куонкуруска кытыннаран, өрөспүүбүлүкэ олохтоохторун сэҥээриитигэр тахсарга кыахта биэриҥ.
Елена ПОТОЦКАЯ, «Саха сирэ» хаһыат, edersaas.ru
