13 оҕону соҕотоҕун ииппит Андрей Прудецкайга “Ытык аҕа” бэлиэни туттарар туһунан Ил Дархан Егор Борисов ыйааҕа таҕыста. Маннык бэлиэнэн дьиэ кэргэн оруолун бөҕөргөтүү, оҕону иитиигэ аҕа оруолун үрдэтии, чөл олоҕу тарҕатыы, уопсастыбаннай олоххо улахан кылааты киллэрии иһин наҕараадалыыллар, диэн edersaas.ru иhитиннэрэр.
Андрей Васильевич Прудецкай туһунан быйыл “Саха сирэ” хаһыакка уонна “Эдэр саас” сайтка бэчээттээн турабыт. Кини билигин Дьааҥы улууһугар «Эрэл» тэрилтэҕэ сылгыһытынан үлэлиир. Ааҕааччыларбыт суруйууну сэргээн, кырдьык да, “Ытык аҕа буоллаҕына, кини буолуон сөп эбит” диэн санааларын эппиттэрэ. Ол санаа өтөрүнэн туолан, Андрей Прудецкай үрдүк наҕараадаҕа тигистэҕэ. Кини соҕотох киһи дэбигис кыайбатын кыайан, сатаабатын сатаан, киһилии майгытынан, дьулуурунан, олоххо тардыһыытынан үгүс дьоҥҥо холобур буолар аҕа. Редакциябыт аатыттан ытык аҕаны эҕэрдэлиибит.
Надежда Аржакова-Иванова ыстатыйатыгар маннык суруллубута:
“Андрей Васильевич Прудецкай — 13 оҕону соҕотоҕун ииппит аҕа. Ийэлэрэ Анисия Афанасьевна уон төрдүс оҕотун күн сирин көрдөрөөрү сылдьан суох буолбута. Василий эмдэй-сэмдэй 13 оҕону туппутунан хаалбыта, кыралара балтараа эрэ саастааҕа…
Аҕа барахсан, биир таммах арыгыны испэккэ, хара көлөһүнүнэн, хары күүһүнэн оҕолорун улаатыннарда, киһи хара оҥордо. Биллэн турар, оҕолорун иитэригэр элбэх ыарахаттары көрсүбүтэ. Бэйэтэ кыайарынан, сатыырынан барыларын атахтарыгар туруорда. Онон Андрей Васильевич собус-соҕотоҕун тулаайах хаалбыт көмүс чыычаахтарын, 13 оҕотун кынатын анныгар уктан, барыларын бииргэ илдьэ сылдьан, иитэн-үөрэттэрэн, олох аартыгар үктэннэрдэ. Олоххо тардыһар күүстээх санаатынан, дьулуурунан, барар сирэ баҕана үүтэ буолбут кэмнэри, ыарахаттары туораатаҕа.
Төһөлөөх түүн утуйбатаҕа, кырыымчык кыһалҕаттан санааҕа ылларбыта буолуой? Бэйэтэ эрэ биллэҕэ… Хаһан да үҥсэргээбэт, ытыы-соҥуу сылдьыбат эр киһилии майгытынан үгүстэргэ холобур буолар.
Андрей Васильевич “Хатыҥнаах” диэн сайыҥҥы оҕо үлэ-сынньалаҥ лааҕырын тэрийэн, бэйэтин оҕолорун бииргэ илдьэ сылдьан, үлэҕэ уһуйбута. Лааҕыр үлэтэ өрөспүүбүлүкэтээҕи куонкурустарга кыттан, 1-кы, 2-с миэстэҕэ сылдьыбыта. Бу лааҕырга элбэх оҕо кини илиитин иһинэн ааһан, үлэҕэ-хамнаска иитиллибитэ.
Ийэлэрэ суох да буоллар, көмөлөһө сыппыта… Биирдэ, түүлүгэр көстөн: “Кэһиибин уура сытабын, Ойбонукка тиий” диэбит. Онно тиийэн 3 тайаҕы өлөрөн турар. Аар айылҕата киниэхэ булду анаан, дьэ, биэрэр. Ийэлэрэ түүлүгэр ыҥырдаҕына, “бурааныгар” олордо да, барар.
Андрей Васильевич 33 сыл сылгыһыттаабыта. Саха Өрөспүүбүлүкэтин тыатын хаһаайыстыбатын үтүөлээх үлэһитэ, “Гражданскай килбиэн” бэлиэ хаһаайына.
Быйыл алтынньы 15 күнүгэр (2016 с.) А.В.Прудецкай 60 сааһын туолан, оҕолоро үбүлүөй тэрийдилэр. Улуус дьаһалтата – Дьокуускай куораттааҕы «Горняк» санаторийга путевканы, нэһилиэк — убаһаны, тыа хаһаайыстыбатын министиэристибэтэ Бочуотунай грамотаны туттардылар. Киниэхэ анаан Үөһээ Бүлүүттэн, Намтан, Амматтан, Өймөкөөнтөн: «аанньал тэҥэ ытык аҕабыт, киэн туттабыт», «кырдьар сааскар кыһалҕаны билимэ», «холобур буолар, улахан буукубаттан суруллар аҕа» диэн истиҥ тыллаах эҕэрдэлэр кэллилэр.
Дьааҥы улууһун Табалааҕын олохтооҕо Андрей Васильевич Прудецкай — соҕотоҕун 13 оҕону ииппит, 15 сиэннээх, Саха сиригэр холобур буолар Ытык аҕа”.
